19 Few
Türkmenistanyň Saýlaw kodeksiniň 46-njy maddasyna laýyklykda, 2022-nji ýylyň 18-nji fewralynda raýatlaryň teklipçi toparlary tarapyndan 2022-nji ýylyň 12-nji martynda geçiriljek Türkmenistanyň Prezidentiniň saýlawlary boýunça dalaşgärler hödürlenildi. Türkmenistanyň Saglygy goraýyş we derman senagaty ministrliginiň «Awaza» şypahanasynyň baş lukmany, Türkmenistanyň Milli Geňeşiniň Mejlisiniň deputaty Gurbanow Berdimämmet Hanmämmedowiç we Lebap welaýatynyň maliýe-ykdysady orta hünär okuw mekdebiniň direktory Begenjow Perhat Guwançgulyýewiç dalaşgärlige hödürlenildi.
Dalaşgärleri hödürlemek boýunça raýatlaryň teklipçi toparlarynyň ýygnaklary Türkmenbaşydaky nebiti gaýtadan işleýän zawodlar toplumynyň medeni-sport toplumynyň mejlisler zalynda, şeýle-de, Lebap welaýat häkimliginiň mejlisler zalynda geçirildi.
Geçirilen ýygnaklara raýatlaryň teklipçi toparlarynyň agzalary we köpçülikleýin habar beriş serişdeleriniň wekilleri gatnaşdylar.
Raýatlaryň teklipçi toparlary tarapyndan şu güne çenli dalaşgärleriň ikisi hödürlenildi.
